اليوم راح نتكلم عن الغسيل وما أدراك ما الغسيل بعد ما تكلمه عن الطباخ وعن الكباب اللي صار قيمات , وبعد إلحاح الجمهور وصديقي العزيز wafi قررت أنا أن اكمل قصص من واقع الحياة واليوم دور الغسيل .
قبل لا أسافر بيوم إلي الغربة قالت أمي راح اوصيك وأقولك كلام حطه مثل الحلق في اذونك كل اذوني ؟ أنه مو بنيه قولي قالت لا تقاطعني واسمع قلت اوكي
قالت أمي: ويش تقول؟.
أقول اوكي.
قالت : الحين كل يوم معور رأسي الموت إلي أمريكا والموت الى إسرائيل وبعدين تقول هذه الكلمة اللي هي ويش ؟
قلت اوكي .
قالت ايييييييي هذه اوتي .
قلت : أماه مو اوتي اوكي .
قالت : دهو خلنه من هالسالفه واكمل لك السالفة …. اسمعي عدل وبطل اذونك.
قلت : جي اذوني باب أبطله ؟
قالت : فكني واسمع بعد ما عصبت علي اشوي .
قالت : أول شي في الغربة ويش بتا كلون وين بتنامون منهو بغسل اثيابكم؟
قلت : نفخت صدري وقلت انه ……قالت لي انجب أنت تعرف تقلي بيضه؟
قلت: امممممممماه ليش كل جعميني اعرف أسوى بيض مفيوح .
قالت: انزين يا ولدي الحين أقولك عن الغسيل إذا بغسل اثيابك لازم تعزل الأبيض عن الملون والبيج والألوان الغامقة بروح والفاتحه بروح وأنه بس أهز رأسي مثل الهندي أقول زين زين وعن الطبخ كتب لي دفتر بأنواع الطبخات ومن تقصر طبخه اتصل إلي الوالدة وآنه في المطبخ وماسك التلفون وبيدي القفشه وامي تعطيني المقادير وكل هذه وما تضبط الطبخة , جنه تغير الموضوع نرجع للغسيل وبعد ما أخذت الوصاية من الوالدة العزيزة وسافرت أول أسبوعين مستانس ومفر فش الأكل من المطعم والملابس الوسخة في الحمام والبس غيره لاني ما خليت شي في الكبت إلا وجبته حتى اثياب اخوتي اللي قدي وكل شي متشاركين فيه جبته لين ما خلصت ثيابي النظيفة وما عندي شي البس قلت الحين وقت الغسيل .
وين الغسالة وين الصابون بيني وبينكم انه من شفت الملابس مثل الجبل يم الغسالة ضاق خلقي شلون اغسل الأبيض بروح الأسود بروح والملون بروح يعني بعد شهر اخلص قلت خلني أحطهم كلهم مع بعض يعني ويش بيصير ؟
جان أحط الملابس علي بعض الأبيض مع الأسود مع الملون يعي خبصه والغسالة متروسه هدوم كسرت خاطري الغسالة ما تدور عدل من كثر الملابس وانه ابغي الفكه من الغسيل , وبعد ما خلصت الدورة الأولى تذكره شي واحد من كلام الوالدة اللي اهو خل الغسالة تدور مرتين جان أخلي الغسالة تدو مرتين وبعد ما خلصت الغسيل الله لا يوريكم شلون صار لون الماي … لا يروح تفكيركم بعيد مو من الوسخ من لون الملابس أنت تفكيركم شين ادري , انزين اكمل .
بعد ما نشفت الملابس أدور الملابس البيضة علي الحبل ما في شي واصرخ واهاوش علي ربعي لانه في قانون في الشقة اللي قدامك البسه لك لغيرك البس ومشي نفسك , جان اهاوش منو اخذ ملابسي البيضة وكلهم ساكتين وما حد تحجه لكن أطالع الحبل أشوف الحبل كامل لكن ما في ملابس بيضه وأفكر وأقول وين الملابس البيضة وبعد تدوير وتدقيق في الملابس شفت الملابس البيضة صارت ألوان يعني اصفر علي ابيض علي اسود يعني باختصار راحت علي الملابس وتبهدلت وقلت في بالي لنفسي كل ده حصل لاني ما سمعت كلام إلماما .
وسلامتكم وتحياتي للجميع
ويش رأيكم اكتب المره الجايه عن الشقة الجديد اللي تاجرناها وللي صار
الأحد 02 ديسمبر 2007, 13:28
لي
